Neend mein shaayad kalai mudh gayi thi
Agar tumara sar hota uspar to aisa nahi hota
Ye sochkar tumhari badi yaad aayi
Kuch ghante bitaa diye maine, dard mei jab
Mujhe yaad aaya ki tum kalai par jab sote the
Dard to mujhe tab bhi kabhi kabaar ho jaata tha
Ye sochkar bhi phir tumhari yaad aayi
Neend me tum karvat lekar dur jaate the
Kheench leta tha mai halke se apni aur tumko
Tum neend mein muskuraate aur lipat jaate
Ye sochkar tumhari thodi aur yaad aayi
Aaj jab subah hui mera haath to theek ho gaya
Sirahne pe pade marham ki shishi dekha
Tum aksar ise siraahne ke neeche hi rakhte the
Ye sochkar zara phir tumhari yaad aayi
Tumhaari yaad aane tak to baat theek hai
Par tum na ban jaoon, ye darr mujhe lagta hai
Tum jo ban gaya mai, to tumhari yaad nahi aayegi
Ye sochkar tumhaari yaad se darr sa lagaa
No comments:
Post a Comment